Sky News skýrir frá þessu og vitnar í viðtal við Kyrylo Budanov, yfirmann leyniþjónustu úkraínska hersins, um stöðuna í Kreml en hann ræddi málið við úkraínska Pravda og vitnaði Institute for the Study of War (ISW) í viðtalið í stöðumati sínu í gær.
Budanov sagði að ákvörðunin um „innlimun“ héraðanna hafi valdið klofningi í Kreml og hann muni væntanlega fara vaxandi eftir því sem Úkraínumenn ná fleiri landsvæðum úr klóm Rússa.
Hann sagði að meirihluti rússnesku elítunnar styðji ekki innlimun héraðanna fjögurra og að margir rússneskir embættismenn hafi sett sig í samband við starfsbræður sína á Vesturlöndum til að láta í ljós áhugaleysi sitt á að stríðsrekstrinum í Úkraínu verði haldið áfram.
Hann sagði að sumir rússneskir embættismenn hafi talað fyrir friðarviðræðum við Úkraínu við vestræna starfsbræður sína á meðan rússneska herstjórnin hafi látið flugskeytum rigna yfir Úkraínu til að reyna að hræða Úkraínumenn og þvinga þá að samningaborðinu.
ISW segir í stöðumati sínu að þessi ummæli Bodanov séu í samræmi við fréttir sem hafi borist um beina gagnrýni á Pútín innan veggja Kremlar tæpri viku eftir að hann tilkynnti um „innlimun“ héraðanna fjögurra.
Segir ISW að þetta og fleiri atriði bendi til að þeir innanbúðarmenn í Kreml, sem vilja friðarviðræður, gangi ekki í takt við Pútín og séu frekar tilraunir þeirra sem hafa orðið undir í umræðum innan veggja Kremlar til að sannfæra Vesturlönd og Úkraínu um að fallast á málamiðlun.
