Á áttunda tímanum í gærkvöldi var ökumaður kærður fyrir akstur utan vegar í Grafarvogi. Að auki var hann kærður fyrir að vera með tvö nagladekk undir bifreið sinni. Á sjötta tímanum í gær datt maður af reiðhjóli í Kópavogi. Hann var blóðugur í andliti, skrámaður á höndum, skurð á höfði og líklega nefbrotinn. Áfengislykt lagði frá vitum hans. Maðurinn talaði ekki íslensku og vildi ekki þiggja neina aðstoð og gekk á brott frá lögreglu og sjúkraliði.

Í Miðborginni var maður, sem var í annarlegu ástandi, handtekinn á tólfta tímanum. Ítrekað var búið að kvarta undan manninum. Hann var vistaður í fangageymslu.

Á tíunda tímanum var ökumaður handtekinn á Reykjanesbraut í Kópavogi. Hann er grunaður um nytjastuld ökutækis, að hafa verið undir áhrifum fíkniefna, ítrekaðan akstur sviptur ökuréttindum og vörslu fíkniefna.

Tveir ökumenn voru handteknir í gærkvöldi grunaðir um að vera undir áhrifum fíkniefna. Annar þeirra reyndist vera sviptur ökuréttindum og var um ítrekað brot hjá honum að ræða á þeirri sviptingu.

Einn ökumaður var kærður fyrir að aka sviptur ökuréttindum í Breiðholti síðdegis í gær.

Einn ökumaður var kærður fyrir akstur gegn rauðu ljósi í Garðabæ.

Skemmdir voru unnar á sjálfsala við bensínsölu í Hafnarfirði. Reynt hafði verið að komast að seðlageymslu sjálfsalans en það tókst ekki.

Á áttunda tímanum í gærkvöldi var maður, í annarlegu ástandi, handtekinn við Smáratorg. Hann hafði verið að áreita fólk og er einnig grunaður um líkamsárás. Hann var vistaður í fangageymslu.