Þegar lögreglumenn hugðust stöðva akstur ökumanns eins í Kópavogi ákvað hann að sinna ekki stöðvunarmerkjum þeirra og reyndi að komast undan. Lögreglumenn höfðu borið kennsl á viðkomandi en hann er sviptur ökuréttindum vegna ítrekaðs aksturs undir áhrifum áfengis og fíkniefna.

Ökumaðurinn komst þó ekki langt því fljótlega ók hann á aðra bifreið. Þá ákvað hann að reyna að hlaupa frá lögreglumönnunum en það tókst ekki. Þeir náðu honum og handtóku en ökumaðurinn veitti töluverða mótspyrnu . Hann er nú í fangageymslu og bíður þess að verða yfirheyrður. Hann er grunaður um að hafa verið undir áhrifum fíkniefna og að auki var hann með meint fíkniefni í fórum sínum.  Enginn slasaðist í árekstrinum.

Fjórir aðrir ökumenn voru handteknir í gærkvöldi og nótt, við hefðbundið eftirlit lögreglu, grunaðir um að vera undir áhrifum áfengis og/eða fíkniefna. Tveir ökumenn til viðbótar voru handteknir grunaðir um að vera undir áhrifum áfengis en þeir höfðu báðir lent í umferðaróhöppum.

Ökumaður einn varð fyrir því óláni að aka á girðingu nágranna síns. Við skoðun kom í ljós að hann er ekki með ökuréttindi.

Í Hafnarfirði var rútu ekið utan í lögreglubifreið sem skemmdist lítillega.