Kjartan Magnússon, varaþingmaður og frambjóðandi á 3. sæti á lista Sjálfstæðisflokksins í Reykjavík hefur vakið töluverða athygli á samfélagsmiðlum fyrir þátt sinn í myndbandsauglýsingu sem Sjálfstæðisflokkurinn birti á Facebook-síðu sinni í gær. Í myndbandinu má sjá Kjartan á hjóli með hjálm en netverjar hafa haft það að orði að hjálmurinn hans snúi vitlaust.
Leikarinn Vignir Rafn Valþórsson birti til að mynda færslu á Facebook-síðu sinni í gær þar sem hann ræddi um Kjartan á hjólinu. „Þegar maður heldur að þessi kosningabarátta (og þessi flokkur) geti ekki náð dýpri lægðum þá henda þau í myndband sem tönglast á því hvað þau séu öll svo samheldin (einmitt!) og henda Kjartani Magnússyni á hjól til að sýna að þau séu alls ekkert alltaf á bíl,“ segir Vignir í færslunni.
„Ég kaupi þetta ekki alveg. Hefur kannski eitthvað með það að gera að hjálmurinn snýr fokking öfugt.“
DV hafði samband við Kjartan og bar það undir hann hvort hjálmurinn væri vitlaust settur á höfuðið hans í myndbandinu. Kjartan segir það vera fjarri lagi og að hjálmurinn snúi pottþétt rétt í myndbandinu.
„Ég þekki þennan hjálm mjög vel og hef átt hann lengi. Það er ekki séns að láta hann tolla ef hann snýr öfugt,“ segir Kjartan í samtali við blaðamann. „Þeir eru kannski mismunandi hjálmarnir en ég skoðaði hjálminn og það er alveg ómögulegt að setja hann á sig öfugan.“
Einnig hefur því verið velt upp á samfélagsmiðlum að Kjartan sé ekki mikið fyrir að nota hjólfákinn sinn en Kjartan segir í samtali við DV að hann hjóli töluvert. Hann segist bæði hjóla í vinnuna og sér til afþreyingar.
Hér fyrir neðan má sjá myndband Sjálfstæðisflokksins þar sem Kjartan er á hjólinu með hjálminn sinn:
