Hin fallega leggjakönguló (Pholcus phalangoides) var eitt sinn tilfallandi slæðingur með varningi hérlendis en hefur nú formlega sest hér að. Þetta kemur fram í nýrri færslu Facebook-síðunni Heimur smádýranna sem Erling Ólafsson, skordýrafræðingur á Náttúrufræðistofnun Íslands, heldur utan um.

„Hún fannst fyrst í Reykjavík 1988 og svo fljótlega í auknum mæli upp frá því. Á endanum varð nokkuð ljóst að hún hefði náð að setjast hér að. Hér finnst leggjakönguló nú einkum á vörulagerum og í geymsluhúsnæði. Tegundin er algeng í nágrannalöndum okkar og heldur sig fyrst og fremst í húsakynnum allskonar, t.d. á háaloftum, í kjöllurum og geymslum og lendir auðveldlega í varningi til flutnings,“ skrifar Erling.

Hann segir að köngulóin leggjalanga veki sjaldnast mikla kátínu þeirra sem rekast á hana. Þó að hún geti bitið þá sé hún algjörlega meinlaus.

„Svo merkilegt er það að margar og langar lappir vekja gjarnan hroll! Köngulóin er meinlaus og hrekklaus. Hún bítur ekki nema umbeðin og veldur eitrið í versta falli léttvægum sviða í skamman tíma. Það sem mér finnst vont við hana þessa er hve strembið er að mynda hana með þeim græjum sem ég hef. Það er ákaflega erfitt að ná eftirsóttum fókus á þennan flækjufót. Bolurinn verður að vera í fókuspunkti en svo er það algjör tilviljun hvernig fæturnir leggjast í myndflötinn. Minnist þess ekki að hafa nokkurn tímann orðið heppinn með það!“ skrifar Erling.

Nánari upplýsingar um leggjakönguló er að finna á vef Náttúrufræðistofnunar Íslands.