Skömmu fyrir klukkan 22 var tilkynnt um slys í Kópavogi. Fjórir 14 ára piltar voru saman á vespu og var aðeins einn þeirra með hjálm. Ökumaðurinn missti stjórn á vespunni og duttu piltarnir af henni. Þrír þeirra meiddust lítið sem ekkert en sá fjórði missti meðvitund í skamma stund. Hann er talinn hafa fengið heilahristing en hann var fluttur á bráðamóttöku. Málið var unnið með aðkomu foreldra piltanna.

Klukkan tvö í nótt var tilkynnt að skorið hefði verið á dekk bifreiðar í miðborginni og reynt að kveikja í henni.

Á fyrsta tímanum í nótt var ekið á kyrrstæða bifreið í Kópavogi og yfirgaf tjónvaldur vettvang. Akstur hans var stöðvaður skömmu síðar og var hann handtekinn grunaður um að vera undir áhrifum áfengis og fíkniefna. Hann var vistaður í fangageymslu.

Á sjötta tímanum í gær hafði lögreglan afskipti af manni á heimili í Laugarneshverfi en sá er grunaður um vörslu fíkniefna. Á fyrsta tímanum í nótt var lagt hald á fíkniefni hjá manni í Hlíðahverfi en hann framvísaði þeim sjálfur.

Einn ökumaður var handtekinn í gærkvöldi í miðborginni grunaður um að vera undir áhrifum fíkniefna og ítrekaðan akstur án gildra ökuréttinda.

Tveir ökumenn voru kærðir fyrir akstur án ökuréttinda síðdegis í gær. Annar þeirra var einnig kærður fyrir að neita að skýra frá nafni sínu.