Í dag birtist frétt í Morgunblaðinu þar sem greint var frá mögulegri breytingu á deiliskipulagi Kringlubæjar vegna Ofanleitis 14. Þar í dag stendur hinn sívinsæli staður Hamborgarabúlla Tómasar en staðurinn hefur verið þar frá árinu 2009.
Til stendur að rífa niður húsið sem hýsir Búlluna og byggja í staðinn íbúðir og bílakjallara. Við þessa breytingu missa ansi margir ákveðna festu í lífi sínu sem er að heimsækja staðinn.
Í hverju hádegishléi heimsækja tugir, ef ekki hundruð, nemenda við Verzlunarskóla Íslands staðinn enda bara rétt handan við bílastæði nemenda. Það yrði því mikill missir fyrir nemendur skólans ef staðurinn skildi hverfa.
„Þetta er bara leiðinlegt, að missa svona góðan matsölustað í burtu. Maður skilur það alveg að það þurfi að fjölga íbúðum og það er verið að þjónusta okkur í framtíðinni með því að byggja þær,“ segir Kári Freyr Kristinsson, forseti Nemendafélags Verzlunarskóla Íslands, í samtali við DV.
Hann telur að brotthvarf Búllunar muni ekki skerða fæðuöryggi Verzlinga þar sem stutt er að ganga yfir í Kringluna og versla á Stjörnutorgi.
„Ég hef ekki heyrt fólk tala mikið um þetta en ég held að fólk verði ekkert himinlifandi yfir þessu. Ég held að margir verði óánægðir,“ segir Kári að lokum.