Héraðssaksóknari hefur ákært fimm einstaklinga fyrir að hafa tekið þátt í að ræna, frelsisskerða, hóta og fjárkúga konu í Reykjanesbæ haustið 2018. Málslýsingar eru einkar óhugnanlegar og eru fimmmenningarnir ákærðir fyrir fjölda hegningarlagabrota.
Þann 27. september eru einstaklingarnir í ákærunni sagðir hafa svipt konuna frelsi sínu í fjórar klukkustundir, beitt hana hótunum, ofbeldi, þvingað hana til þess að láta af hendi muni í hennar eigu og krafið hana um greiðslu. Fyrir þetta eru þau öll í sameiningu ákærð fyrir mannrán sem varðar allt að fjögurra ára fangelsi. Hins vegar segir í hegningarlögum, að hafi frelsisskerðingin verið gerð í ávinningsskyni skuli beita refsingu að lágmarki 1 árs fangelsi og allt að 16 árum eða ævilangt.
Þá eru tveir karlmenn úr hópnum ákærðir fyrir tilraun til fjárkúgunar með því að hafa ógnað konunni með járnverkfæri, hrækt á hana, hótað að brjóta í henni bein, skera af henni fingur, stinga hana, drepa hana, drepa fjölskyldu hennar, og grafa upp og stinga lík fyrrverandi unnusta hennar. Þá hótuðu þeir enn fremur að klippa af henni hárið. Kröfðust mennirnir að konan greiddi þeim samtals 850 þúsund krónur og þvinguðu þeir konuna til þess að afhenda sér debetkort, síma hennar og aðgang að heimabanka konunnar þar sem þeir sóttu um lán í hennar nafni.
Fjárkúgun varðar allt að sex ára fangelsi.
Annar þessara manna er jafnframt ákærður fyrir að hafa haft í fórum sínum lítilræði af kókaíni í vasa sínum sem fannst við leit í fangaklefa á lögreglustöðinni í Keflavík haustið 2019.
Þriðji maðurinn í hópnum er svo sagður hafa hótað konunni með járnáhaldi, hótað að nauðga henni og að láta nauðga henni, „koma henni í sölu,“ og krafið hana um 400 þúsund krónu greiðslu. Er maðurinn fyrir þetta ákærður fyrir fjárkúgun. Þessi sami maður er svo jafnframt ákærður fyrir hótanir, en degi eftir hina meintu árás á konuna, þann 28. september, er hann sagður hafa hótað að drepa konuna og móður hennar. Féllu orð mannsins er hann var staddur í fangaklefa á lögreglustöðinni í Keflavík.
Sá fjórði og fimmti eru svo ákærðir fyrir tilraun til fjárkúgunar og ólögmæta nauðung og rán með því að hafa beitt konuna samskonar hótunum og að ofan lýsir, auk þess sem þeir ýttu við henni, lömdu hana, börðu nokkrum sinnum í andlitið og í sköflung, rifu í hár hennar og kröfðu hana um 70 þúsund krónu greiðslu. Annar mannanna er þá sagður hafa skrifað „Rotta“ á enni konunnar og tekið af henni 66°N Þórsmörk úlpu. Hlaut konan af árás mannanna nokkur eymsli á höfði og nefi, auk annarra sára víða um líkamann.
Tveir hinna ákærðu eru búsettir í Reykjanesbæ, einn í Reykjavík, einn í Hafnarfirði og sá síðasti í Svíþjóð. Málið var samkvæmt dagskrá Héraðsdóms Reykjaness þingfest 10. júní síðastliðinn.