Herði Áskelssyni, kantor, kórstjóra og organista í Hallgrímskirkju var vikið frá störfum fyrir skömmu.
Þessi ákvörðun sóknarnefndar Hallgrímskirkju hefur vakið mikla athygli og óánægju víða. Mótettukór Hallgrímskirkju hefur nú ályktað um málið á Facebook-síðu sinni og segir:
„Sóknarnefnd Hallgrímskirkju hefur vikið Herði Áskelssyni úr starfi kantors Hallgrímskirkju. Hörður stofnaði Mótettukórinn árið 1982 og hefur leitt hann farsællega síðan, aukið veg kirkjutónlistar á Íslandi svo að um munar og skapað umgjörð um kórstarf sem hefur verið líf og yndi hundraða söngvara. Við þessi tímamót vill Mótettukórinn senda Herði kveðju sína og þökk, og segja honum að kórinn fylgi honum hvert á land sem er úr Hallgrímskirkju 31. maí, á vit þess sönglífs sem hann vill hafa forystu um að skapa.“
Margir núverandi og fyrrverandi félagar í kórnum tjá sig á samfélagsmiðlum og lýsa yfir mikilli óánægju með brotthvarf Harðar. Margir tjá sig í löngu máli um glæstan feril Harðar en einn lætur þetta nægja:
„Vér mótmælum þessum gjörningi!“
https://www.facebook.com/motettukor/posts/10165505922875392