Ökumaður sem stöðvaður var af lögreglu í nótt reyndust bæði undir áhrifum fíkniefna og áfengis, hafa ítrekað verið svipt ökuréttindum og hafa fíkniefni á sér. Var ökumaðurinn því handtekinn. Af lestri dagbókar lögreglu má ráða að hún hafi hreint út sagt ekki verið svo kát með það, því ofan á langan listann hér að ofan bættist þá brot gegn valdstjórninni. Einstaklingurinn er ung kona, að því er segir í dagbókinni, en atvikið átti sér stað í 108 Reykjavík.
Nóg virðist hafa verið að gera hjá lögreglunni í nótt og í gærkvöldi.
Ráðist var á mann á Granda um kvöldmatarleitið í gær. Þegar lögregla kom á vettvang var þar maður sem sagðist ekki geta stigið í fótinn og var því sjúkrabíll kallaður til. Árásarmaðurinn var á bak og burt, en fannst um þremur klukkustundum síðar.
Rétt eftir níu í gærkvöldi hafði lögreglan hendur í hári býsna stórtæks verkfæraþjófs. Þegar lögregla kom auga á manninn reyndist hann vera „hendurnar fullar“ af rafmagnsverkfæratöskum. Maðurinn viðurkenndi strax að hafa brotist inn í bíl og náð sér í þessi verkfæri þannig. Hann leiddi lögreglu að bílnum og eigandi verkfæranna var kvaddur á lögreglustöð þar sem hann vitjaði eigna sinna.
Þrír hið minnsta, til viðbótar við ungu konuna voru handteknir vegna ölvunar og/eða fíkniefnaaksturs í nótt.
Þá stöðvaði lögregla för ökumanns á hraðferð í Ártúnsbrekkunni. Maðurinn ók þar á 127 þar sem hámarkshraðinn er 60 km/klst. Maðurinn kvaðst vera orðinn of seinn í mat.