Von er á samtals 244.000 bóluefnaskömmtun frá Pfizer til Íslands í maí, júní og júlí. Þetta staðfestir heilbrigðisráðuneytið á stjornarradid.is í dag.
Búið var að gera ráð fyrir 46.000 skömmtum frá Pfizer í júlímánuði en sú tala tvöfaldaðist í dag. Í maí berast síðan 70.200 skammtar hingað til lands og 82.000 í júní.
Myndin hér að neðan sem sýnir staðfestar afhendingaráætlanir bóluefna hefur verið uppfærð samkvæmt staðfestum upplýsingum um afhendingu Pfizer, nema að ekki liggur fyrir hvernig vikulegri afhendingu bóluefnanna í júlímánuði verður háttað.
Bóluefnadagatal heilbrigðisráðuneytisins og sóttvarnalæknis verður uppfært eftir helgina.
Í dag staðfesti Þórólfur Guðnason við mbl.is að heilbrigðisyfirvöld hér myndu ekki sækjast eftir skömmtum Dana af AstraZeneca bóluefninu. Þeir tilkynntu í vikunni að þeir ætluðu að hætta að bólusetja með bóluefninu eftir að tilkynningar bárust um blóðtappa í örfáum af þeim sem fengu bóluefnið.