Morgunblaðið skýrir frá þessu í dag. Eins og fram hefur komið segir í yfirlýsingu stjórnenda RÚV að úrskurðurinn muni ekki hafa áhrif á störf Helga því ekkert hafi komið fram í honum um að Helgi hafi gerst brotlegur í starfi í lagalegum skilningi. Við þetta eru forsvarsmenn Samherja ekki sáttir og krefjast þess að hann fjalli ekki frekar um málefni fyrirtækisins. Þetta kemur fram í bréfi sem lögmaður Samherja sendi stjórn RÚV.
Morgunblaðið segir að í bréfinu sé bent á að samkvæmt úrskurði siðanefndarinnar hafi Helgi gerst sekur um hlutdrægni og „gengið lengra en sem nam því svigrúmi sem hann hafði til að deila fréttum og fylgja þeim eftir með gagnrýnum spurningum eða ummælum, sambærilegum þeim sem hann myndi viðhafa sem fréttamaður, jafnvel þó slíkt væri gert í eigin nafni.“
Segir í bréfinu að þessi brot séu alvarleg og ítrekuð og ef niðurstaða siðanefndar hafi engin áhrif á störf Helga hjá RÚV sé RÚV að segja að hægt sé að brjóta siðareglurnar að vild án þess að það hafi afleiðingar.
Krefst Samherji þess því að stjórn RÚV taki úrskurð siðanefndarinnar til sérstakrar athugunar svo slys sem þetta eigi sér ekki aftur stað. Einnig að stjórnin kanni hvort starfsmannaréttarleg viðurlög, eins og áminning, eigi við.
