Fréttablaðið skýrir frá þessu í dag. Haft er eftir Rögnvaldi Ólafssyni, deildarstjóra hjá almannavörnum, að gert sé ráð fyrir að nokkrir klukkutímar gefist til að bregðast við gosi þar sem hraun á þessu svæði sé seigfljótandi og fari ekki hratt yfir.
Meðal þess sem verið er að skoða er að móta landið með stórtækum jarðvinnuvélum til að stýra hraunflæðinu í ákveðna átt. Nú er verið að kortleggja hvaða vinnuvélar eru til á svæðinu en Rögnvaldur sagði að hugsanlega þurfi að sækja vinnuvélar víðar af landinu, sérstaklega til svæða í nágrenni við Suðurnes.
Einnig þarf að meta virði mannvirkja með tilliti til björgunarkostnaðar, tíma, áhættu og flækjustigs að hans sögn. Einnig geti sú staða komið upp að það sé betri kostur að leyfa hrauninu að fara yfir og byggja á nýjan leik. Hann sagði að skást væri að hraunið flæði í suður og út í sjó en þá mun það fara yfir kafla á Suðurstrandarvegi. „Það ætti þá að vera einfalt að leggja nýjan veg á sama stað. Hiti myndi lúra í hrauninu í einhvern tíma og bíða þyrfti í einhverja daga, vikur eða mánuði þar til hægt væri að leggja nýjan,“ sagði hann.
Ef hraunið renni annað og ógni mannvirkjum þurfi að horfa á landslagið í heild og meta hvernig sé hægt að stýra flæðinu. „Það þarf að horfa á heildarmyndina því breyting á landslagi á einum stað getur haft áhrif á hraunflæði annars staðar,“ sagði hann.
