Stór jarðskjálfti fannst á höfuðborgarsvæðinu nú laust fyrir klukkan 10. Ljóst er að margir fundu fyrir jarðskjálftanum þar sem vefsíðan vedur.is lá niðri skömmu eftir skjálftann. Þegar síðan komst aftur í loftið má sjá að upptök jarðskjálftans voru á Krýsuvíkursvæðinu samkvæmt óyfirförnum mælingum Veðurstofunnar. Skjálftinn var af stærðinni 5,4.
Skjálftinn fannst út um allt höfuðborgarsvæðið miðað við frásagnir Íslendinga á Twitter. Fólk í Hafnarfirði, Grafarvogi, Árbæ, Kópavogi og víðar hefur greint frá því að hafa fundið fyrir skjálftanum.
„Allar hurðarnar fóru á fleygiferð og kötturinn hljóp undir rúm,“ segir til að mynda einn íbúi sem DV ræddi við sem staðsettur er á Reykjanesinu.
Jarðskjálftanum fylgdu einnig sterkir eftirskjálftar sem fundist hafa á höfuðborgarsvæðinu og á Reykjanesinu samkvæmt fólki sem DV hefur rætt við.
Í október var síðast stór skjálfti sem fannst vel víða um land en mældist sá stærsti þá 4,9
Uppfært 10:21
Tveir minni skjálftar hafa mælst.
10:27
Veðurstofa hefur endurmetið skjálftann upp á 5,7 á Richterskvarðann. Á heimasíðu Veðurstofu segir: Jarðskjálfti varð kl. 10:05 að stærð M5,7 um 3 km SSV af Keili. Unnið er að nánari yfirferð á skjálftavirkninni.
10:31
Annar stærri skjálfti fannst vel rétt í þessu.
10:36
Búið að virkja samskiptastöð Almannavarna. Hjördís Guðmundsdóttir samskiptafulltrúi Almannavarna segist ekki geta svarað fyrir slys á fólki að svo stöddu. „Það er verið að kanna þetta allt saman“ Er björgunarsveitin komin í málið? „Ekki enn, það er bara verið að fara yfir málið.“
10:46
25 skjálftar hafa mælst yfir 3 á Richterskvarðann.
10:50
Engar tilkynningar hafa borist um meiðsli á fólki eða tjón á mannvirkjum samkvæmt tilkynningu frá Almannavörnum.