Fréttablaðið skýrir frá þessu í dag. Fram kemur að kostnaðurinn við tannréttingar eins barns geti slagað í tvær milljónir. Í flestum tilvikum fær fólk aðeins 100.000 til 150.000 krónur í styrk frá Sjúkratryggingum en þessir styrkir hafa ekki hækkað í tvo áratugi.
Ef tillit er tekið til verðlagshækkana ætti 150.000 króna styrkur fyrir tveimur áratugum að vera 340.000 krónur í dag. Á þessum tíma hafa verðskrár hækkað og kostnaður heimilanna er því í hæstu hæðum þegar kemur að tannréttingum.
„Ég var áður formaður tannlæknafélagsins þegar við gerðum barnasamningana og er ekki síst mjög ósátt við þetta ástand í ljósi þess að tannskekkjur og skakkt bit eru í flestum tilvikum eitthvað sem fólk hefur enga stjórn á,“ hefur Fréttablaðið eftir Kristínu Heimisdóttur, formanni Tannréttingafélags Íslands.
Hún benti á að hvað varðar tannskemmdir þá skipti tannhirða fólks miklu um hvort tennurnar skemmast eða ekki.
Hún sagði ljóst að margir veigri sér við að senda börn sín í tannréttingar því heimili hafi ekki efni á þeim.
Hér á landi er talið að 30-40 prósent barna hafi þörf fyrir tannréttingar. Kristín sagði að ekki sé verið að gera kröfu um að allir séu með fullkomnar tennur en skakkar tennur og bitskekkjur geti hins vegar unnið á beini, haft áhrif á slímhúð, stóraukið líkurnar á tannbrotum og valdið eyðingu. Einnig geti tennur haft mikil sálræn áhrif á sjálfsmynd barna.
