Dómur var felldur í gær í Héraðsdómi Reykjavíkur yfir manni sem ákærður var fyrir að hafa komið inn á KFC í Sundagörðum 2 í Reykjavík, grímuklæddur og vopnaður tveimur stórum búrhnífum, hafa ógnað starfsstúlku á staðnum og krafið hana um að opna kassann. Þegar stúlkan sagðist ekki geta það reyndi maðurinn sjálfur að opna kassann með hnífi en það tókst ekki og hvarf hann þá burtu af vettvangi.
Atvikið átti sér stað í janúar á þessu ári. Auk ákæru um þennan verknað var maðurinn ákærður fyrir fjölda annarra brota, meðal annars fyrir þjófnað úr versluninni Sports Direct.
Í vitnaleiðslum fyrir dómi kom fram að maðurinn glímdi við geðræn vandamál á þessum tíma sem afleiðingu af fíkniefnaneyslu. Var hann haldinn ranghugmyndum og ofskynjunum, heyrði raddir. Vandamál hans hófust er hann missti vinnuna árið 2019. Leiddist hann út í mikla áfengis- og vímuefnaneyslu og var mjög illa haldinn árið 2020 og fram á þetta ár.
Maðurinn kvaðst ekki vera ofbeldisfullur að eðlisfari og hafa leitað sér hjálpar vegna geðrænna vandamála sinna og neysluvandamála. Játaði hann brot sín skýlaust fyrir dómi.
Var maðurinn dæmdur í sex mánaða skilorðsbundið fangelsi. Hann er hins vegar sviptur ökurétti ævilangt en alvarleg umferðarlagabrot voru í ákærunni gegn honum.
