Þau tíðindi bárust í gær, fimmtudaginn 7. janúar, að Donald Trump Bandaríkjaforseti viðurkenndi ósigur sinn og kvaðst hann ætla að stuðla að friðsælum valdaskiptum í borginni 20. janúar næstkomandi. Lauk þar með 66 daga óvissuog óttatíð í bandarískum stjórnmálum sem náði hápunkti sínum í gær með blóðugum mótmælum við þinghúsið.
Þó að ljóst hafi verið í hvað stefndi strax daginn eftir kosningarnar ríghélt Donald Trump í fullyrðingar sínar fjórum dögum eftir þær. Með sigri í Pennsylvaníu hafði Joe Biden, frambjóðandi Demókrataflokksins, náð nægilega mörgum kjörmönnum til þess að teljast sigurvegari kosninganna. Þegar öll atkvæði höfðu verið talin reyndist Joe Biden vera með 306 kjörmenn, eða 36 fleiri en hann þurfti til þess að hafa meirihluta kjörmannanna.
Að öllu jöfnu hefði þetta verið endalok forsetatíðar Donalds Trump. Svo var ekki.
Þess í stað fór forsetinn af stað í bíræfna herferð gegn lögmæti kosninganna þar sem hann varpaði fram alvarlegum ásökunum án nokkurra sannana um svindl, talningamistök, horfin atkvæði, dauða kjósendur. Vissum botni náði Trump svo þegar Washington Post birti um klukkutíma langt símtal Donalds Trumps við flokksbróður sinn í Georgíu, Brad Raffensperger, ráðherra í Georgíuríki, þar sem hann bað hann um að „finna“ þau atkvæði sem hann vantaði upp á til þess að vinna ríkið. Eftir upphaflega talningu atkvæða og tvær endurtalningar tapaði forsetinn ríkinu með 11.799 atkvæðum. „Sjáðu til. Eina sem ég vil er þetta. Ég vil bara finna 11.780 atkvæði,“ sagði forsetinn í samtalinu sem Raffenberger lýsti sem „mjög óviðeigandi“.
Fyrr um daginn var reyndar fátt sem benti til þess að Donald hygðist gefa eftir. Í gærmorgun hélt Donald Trump þéttsetinn fjöldafund við Hvíta húsið þar sem hann ávarpaði stuðningsmenn sína sem höfðu komið víðs vegar að til þess að taka þátt í skipulögðum mótmælum við þinghúsið seinna um daginn. Í þinginu fór fram lokatalning atkvæða kjörmanna hvers ríkis fyrir sig. Talningin var jafnframt lokahnykkurinn á því langa ferli sem bandarískar forsetakosningar eru.
Um eittleytið að staðartíma ruddust mótmælendur fram hjá girðingum lögreglunnar við þinghúsið. Innan við klukkutíma síðar voru myndir farnir að berast af mótmælendum inni í þinghúsinu og fréttir af því að þingmönnum hefði verið sagt að fela sig undir borðum í þingsal efri og neðri deildarinnar og að þeir ættu að búa sig undir að þurfa að bera gasgrímur. Leyniþjónustan dró varaforsetann út úr þingsalnum og í öruggt skjól á ótilgreindum stað.
Óstaðfestar fréttir bárust svo af því að manneskja hefði verið skotin, þó að fyrstu fréttir gæfu það til kynna að þetta hefði gerst á lóð þinghússins. Síðar kom í ljós að hún var skotin inni í þinghúsinu, og að hún væri látin. Óeirðaseggirnir birtu svo myndir af sér sitjandi í sæti Nancy Pelosi á skrifstofu hennar, í sæti varaforseta Bandaríkjanna í þingsal öldungadeildarinnar og að bera muni út úr þinghúsinu, svo sem ræðupúlt forseta fulltrúadeildarinnar.
Þegar upp var staðið kostuðu mótmælin fimm mannslíf, og breyttu engu um gang mála í bandarískum stjórnmálum. Bandaríkjaþing hélt áfram talningu atkvæða eftir að lögregla hafði rýmt húsið og tryggt svæðið. Hlaut kjör Joes Biden í embætti forseta Bandaríkjanna staðfestingu þingsins eins og búist var við og, sem fyrr sagði, viðurkenndi Trump ósigur sinn í fyrsta skipti fljótlega í kjölfar þess.
Á miðnætti í nótt flutti CNN svo ávarp Donalds Trumps þar sem hann, í fyrsta skipti, sagði afdráttarlaust að hann ætlaði að láta af völdum og að tilraunir hans til þess að halda í stjórnartaumana væru fullreyndar.
158 milljónir Bandaríkjamanna tóku þátt í kosningunum. Meirihluti þeirra hafði nýtt sér möguleikana á að kjósa utankjörfundar vegna COVID-19 faraldursins. Vegna hins mikla fjölda utankjörfundaratkvæða var ljóst að talning myndi taka miklu lengri tíma en áður. Sú spá átti eftir að rætast.
4. nóvember:
Ljóst var þá að mjótt yrði á munum í nokkrum ríkjum. Öll augu beindust að Pennsylvaníu, Michigan, Georgíu, Nevada, Wisconsin og öðrum sveifluríkjum. Lögmannateymi Trumps krafðist endurtalningar í Wisconsin þar sem munurinn var innan við 1%, og að talningu atkvæða í Michigan yrði hætt. Á sama tíma blésu stuðningsmenn Trumps til mótmæla á öðrum stöðum í Bandaríkjunum og kröfðust þess að öll atkvæði yrðu talin. Í lok dags var ljóst að Biden vantaði aðeins sigur í Pennsylvaníu til þess að tryggja sér sigur.
5. nóvember:
Öll augu beindust að talningu í Pennsylvaníu. Trump varpaði fram ásökunum um víðtækt samsæri gegn sér sem kristallaðist í allsherjar kosningasvindli í þeim ríkjum þar sem hann tapaði. Trump boðaði málaferli í þeim ríkjum.
7. nóvember:
Fjölmiðlar vestanhafs tilkynntu sigur Bidens í Pennsylvaníu, og að hann yrði þar með næsti forseti Bandaríkjanna. „Kosningunum er ekki lokið,“ sagði Trump í yfirlýsingu.
9. nóvember:
Lögmannateymi Trumps sagðist hafa hafið málaferli í fjölmörgum ríkjum, en fyrst og fremst í Pennsylvaníu. Þau áttu eftir að krefjast þess að úrslitin yrðu felld úr gildi. Málinu var vísað frá í harðorðum dómi þar sem dómarinn sagði málatilbúnað Trumps forkastanlegan.
15. nóvember:
Fyrstu vísbendingar þess að Trump væri að átta sig á stöðunni bárust er Trump tísti: „Biden vann með svindli.“ Fjölmiðlar tóku þessu sem viðurkenningu á ósigri, en Trump tók af allan vafa seinna á Twitter: „Ég vann.“
20. nóvember:
Málaferli í gangi í Nevada, Michigan, Wisconsin, Pennsylvaníu, Minnesota, og Georgíu. Allt ríki sem Trump tapaði í.
26. nóvember:
Trump sagðist ætla að láta af völdum með friðsælum hætti ef Biden ynni atkvæðagreiðslu kjörmannanna, en sagði að ef Biden sigraði yrði það með svindli. Sjálfur væri hann réttkjörinn forseti Bandaríkjanna.
1. desember:
Biden kynnti fleiri ráðherra í ríkisstjórn sinni og lagði drög að fyrstu vikum sínum í embætti.
7. desember:
Washington Post sagði Trump hafa ítrekað haft samband við þingmenn í ríkisþinginu í Pennsylvaníu og þrýst á að þeir beittu sér fyrir því að úrslitunum þar yrði breytt honum í hag.
12. desember:
Fyrstu stóru mótmæli stuðningsmanna Donalds Trump í Washington. Lögregla notaði táragas.
14. desember:
Kjörmenn hittust í sínum ríkjum og kusu næsta forseta Bandaríkjanna. Aftur tapaði Trump.
1. janúar:
Donald Trump tilkynnti „The BIG Protest Rally“ 6. janúar á Twitter.
3. janúar:
Nýtt þing hófst. Meirihlutinn undir stjórn Demókrata en stjórn efri deildarinnar átt eftir að ráðast.
5. janúar:
Íbúar Georgíu kusu.
6. janúar:
Efri og neðri deild hittust til að telja atkvæði kjörmanna í forsetakjörinu og staðfesta það sem allir vissu.
Donald Trump ávarpaði stuðningsmenn sína við Hvíta húsið. Í kjölfar ávarpsins fylktu mótmælendurnir liði að þinghúsinu.
Klukkan 13.00 brutu þeir sér leið inn í húsið. Fimm létust í óeirðunum, þar á meðal einn lögreglumaður.
7. janúar:
Forsetinn segist ætla að láta af völdum 20. janúar.
