Tveimur deildum í leikskólanum Austurkór í Kópavogi hefur verið lokað vegna myglu í klæðningu á  útvegg, sem er á suðvesturhlið leikskólans. Lokunin er gerð í varúðarskyni til þess að vernda starfsmenn og nemendur.

Deildirnar hafa ekki verið nýttar í daglegu starfi en nýttar til sérkennslu fyrir litla hópa. Því hefur lokunin takmörkuð áhrif á leikskólastarf í Austurkór en alls eru 76 börn í skólanum.

Myglan greindist í kjölfar einkenna starfsmanns sem grunur lék á að rekja mætti til mygluskemmda. Verkfræðistofan Mannvit fengin til að taka sýni og senda til greiningar hjá Náttúrufræðistofnun Íslands. Ekki fannst mygla í þeim sýnum.

Til þess að gæta að öryggi nemenda og starfsmanna var farið í frekari sýnatöku og þá  tekin sýni úr einangrun útveggjar og gipsklæðningu á suðvesturhlið, þar sem vart hafði orðið við leka. Niðurstaða úr þeirri greiningu sem kemur frá Náttúrufræðistofnun Íslands sýnir myglu í útvegg deildarinnar.

Viðgerðir á Austurkór eru þegar hafnar. Til stendur að fjarlægja einangrun innandyra og klæða húsið að utan á sambærilegan hátt og á norðurhlið hússins.

Fundað hefur verið með foreldraráði og starfsfólki skólans og þá hafa foreldrar í leikskólanum verið upplýstir um stöðu málsins.