Karlmaður á þrítugsaldri sem sagður er hafa rústað bíl Svölu Lindar Ægisdóttur, beitt son hennar ofbeldi og ofsótt fjölskylduna, meðal annars með líflátshótunum, hefur verð úrskurðaður í gæsluvarðhald til 15. apríl.

Tilkynning lögreglunnar um málið er eftirfarandi:

„Karlmaður á þrítugsaldri var í dag í Landsrétti úrskurðaður í gæsluvarðhald til 15. apríl, en maðurinn er grunaður um frelsissviptingu, ítrekuð brot gegn nálgunarbanni, hótanir og eignaspjöll. Ætluð brot mannsins voru framin á rúmlega þriggja og hálfs mánaða tímabili, eða frá því í lok nóvember á síðasta ári og fram í miðjan mars á þessu ári. Þá hefur viðkomandi stöðu sakbornings í sex öðrum málum, sem eru til meðferðar hjá lögreglu.

Lögreglan á höfuðborgarsvæðinu lagði fram kröfu í Héraðsdómi Reykjavíkur sl. fimmtudag um gæsluvarðhald yfir manninum, en henni var hafnað. Sá úrskurður var kærður til Landsréttur, sem hefur nú snúið honum við eins og að framan greinir.“

DV hafði samband við Svölu Lind vegna málsins og sagði hún að þetta væri mikill léttir. Sjálf var hún nýbúin að fá fréttirnar um gæsluvarðhaldskúrskurðinn. Hún staðfesti að maðurinn hefði ekki gert vart við sig síðan skemmdarverkin á bílnum voru framin þann 16. mars. Hann var handtekinn um það bil sólarhringi síðar en gæsluvarðhaldskröfu lögreglunnar var þá hafnað í Héraðsdómi. Eins og segir í tilkynningu lögreglunnar sneri Landsréttur þeim úrskurði við.

„Nú höfum við smá andrými,“ segir Svala í stuttu spjalli við DV. Hún segir að engin framtíðarlausn sé komin og hún viti ekki hvað framtíðin ber í skauti sér en hún er mjög ánægð með þennan gæsluvarðhaldsúrskurð sem gefur fjölskyldunni frið og hugarró næstu vikurnar.