Fréttablaðið skýrir frá þessu í dag. Blaðið hefur eftir Ragnari Þó að málið sé honum óviðkomandi og að hann hafi ekki lagt net í ána. Lögreglan á Suðurlandi staðfesti við Fréttablaðið að kæra hafi borist vegna ólöglegrar netalagnar í Holtsá sem rennur í Skaftá. Kæran barst í lok október. Rannsókn málsins er nú lokið og er það til meðferðar hjá ákærusviði.
Fréttablaðið segir að þrír menn hafi staðið að netalögninni og segist blaðið hafa eftir áreiðanlegum heimildum að Ragnar Þór hafi verið á meðal þeirra. Ekki má leggja net í ána.
Ragnar Þór sagði í samtali við Fréttablaðið að hann hafi ekki verið kærður og tók fram að málið tengist honum ekki. „Þetta mál tengist mér ekki heldur snýst það um deilur landeigenda á þessu svæði, að ég best veit,“ er haft eftir honum. Aðspurður sagðist hann ekki hafa verið í hópnum sem lagði net í ána. „Ég lagði ekki nein net þarna, mér finnst með algjörum ólíkindum að það sé verið að draga mig inn í mál sem er mér óviðkomandi,“ sagði hann.
Netalögnin átti sér stað í Holtsdal sem er 917 hektara landsvæði í Holti í Vestur-Skaftafellssýslu og er í eigu Seðlabankans. Veiðiréttur i Holtsá fylgir landinu en á því standa tveir bústaðir í eigu bankans.
Fréttablaðið segir að það hafi verið bóndi af nálægum bæ sem kærði netalögnina. Hann kom að henni og tók netið upp og tilkynnti málið til lögreglunnar. Gestir í öðrum bústað Seðlabankans urðu einnig varir við netalögnina að sögn Fréttablaðsins.
