Héraðsdómur Reykjavíkur sakfelldi í dag karlmann fyrir líkamsárás í anddyri fjölbýlishúss í Reykjavík í desember 2018. Sló maðurinn annan mann einu höggi með flötum lófa hægra megin í andlitið með þeim afleiðingum að brotaþoli hlaut eymsli undir hægra auga.

Lögreglan á höfuðborgarsvæðinu sótti málið og krafðist þess að maðurinn yrði dæmdur til refsingar og til greiðslu alls sakarkostnaðar. Þá gerði brotaþoli kröfu um greiðslu rúmlegra einnar milljóna króna í skaðabætur úr hendi árásarmannsins.

Í læknaskýrslu sem lögð var fram við meðferð málsins fyrir dómi kom fram að búist var við því að maðurinn næði sér að fullu á um viku tíma. Hann ætti á þeirri viku að taka bólgueyðandi lyf eins og Íbúfen. Sjúkrasaga mannsins varð þá jafnframt til umfjöllunar og er þar sögð „flókin,“ fyrst og fremst vegna meiðsla sem maðurinn hefur hlotið af fyrri líkamsárásum. Sú síðasta var aðeins mánuði fyrir líkamsárásina sem hér um ræðir.

Ákærði í málinu játaði sök og krafðist þess að honum yrði gerð vægasta refsing sem lög leyfa. Fram kemur í dómnum að maðurinn er fæddur árið 1950 og er því sjötugur. Maðurinn hefur ekki gerst áður brotlegur við lög og þótti því refsing hans hæfilega ákveðin fangelsi í 30 daga og er dómurinn skilorðsbundinn til tveggja ára. Þá þarf árásarmaðurinn að greiða fórnarlambi sínu 150 þúsund krónur í skaðabætur og 200 þúsund krónur í málskostnað.