Hælisleitenda frá Nígeríu, Uhunoma Osayomore, hefur verið hafnað hæli hér á landi. Hann glímir við andleg veikindi og er fórnarlamb mansals. Lögmaður hans, Magnús Davíð Norðdahl, lögmaður mannsins vekur athygli á þessu, en hann lýsir málsmeðferð stjórnvalda sem ótilhlýðilegri. Uhunoma lagði á flótta frá Nígeríu á barnsaldri og kom hingað til Íslands fyrir tæpu einu og hálfu ári, en fram kemur að hann hefur myndað hér sterkt félagslegt net.

Útlendingastofnun og kærunefnd útlendingamála hafa synjað Uhunoma Osayomore um hæli og telja ranglega að hann sé öruggur í heimaríkinu Nígeríu og geti fengið þar viðunandi aðstoð. Magnús bendir á að þetta fari þvert á  alþjóðlegar skýrslur sem taki af öll tvímæli um hversu slæmt ástandið er þar í landi.

„Sem dæmi má nefna að fjöldi geðlækna í Nígeríu er einungis 300 talsins en heildarfjöldi íbúa rúmar 200 milljónir. Það er sambærilegt við að einn stakur geðlæknir í hálfu starfi myndi sinna allri íslensku þjóðinni.

Þá hafa fórnarlömb mansals litla sem enga möguleika á því að leita til lögregluyfirvalda vegna landlægrar spillingar og sinnuleysis lögreglu í garð þessa hóps.

Mat íslenskra stjórnvalda á aðstæðum mansalsfórnarlamba í Nígeríu er óforsvaranlegt og rangt.“

Magnús bendir einnig á að kærunefnd útlendingamála hafi jafnframt synjað Uhunoma Osayomore um frestun réttaráhrifa sem felur í sér að nefndin vill að honum verði komið úr landi með valdi áður en honum gefst tækifæri til þess að bera mál sitt undir dómstóla.

„Það er að mínu áliti klárt brot á stjórnarskárvörðum rétti borgaranna að að þeim sé vísað úr landi áður en dómstólar hafa fjallað um réttmæti málsmeðferðarinnar sem þeir máttu sæta. “

Hann segir að málið sé á leiðinni til Héraðsdóms Reykjavíkur á næstu dögum og þá verður endurupptökubeiðni einnig send á kærunefnd útlendingamála. Magnús vonast til þess og trúir að málið fái farsælan endi.

Þá minnist hann á að mörg svipuð mál hafi komist í umræðuna upp á síðkastið, en honum finnst þróunin sorgleg og úr takt við áherslur stjórnvalda. Hann segir að þessu þurfi að linna.

„Þetta mál er eitt margra síðustu misseri þar sem fórnarlömbum mansals og kynferðisofbeldis er synjað um hæli hér á landi. Það er ákaflega sorgleg þróun og ekki í takt við þær áherslur núverandi stjórnvalda á mannréttindi og vernd þeirra sem hafa orðið fyrir ofbeldi af þessu tagi.“

„Framferði stjórnvalda í þessu máli og öðrum keimlíkum er andstætt þeim grunngildum sem við stöndum fyrir sem þjóð. Þessu þarf að linna.“