Þeir Matthías Jón Karlsson og Vigantas Visinskis hafa hafa verið ákærðir fyrir framleiðslu og vörslu á amfetamíni. Í ákæru er málið sagt vera stórfellt fíkniefnalagabrot en hin meinta iðja þeirra félaga á að hafa átt sér stað í íbúð í Breiðholti snemma í vor, í um hálfan mánuð. Eru þeir sagðir hafa framleitt rúmlega 11 kg og 3,30  ml af amfetamíni.

Þess má geta að Matthías er einn sakborninga í hinu svokallaða Bitcoin-máli. Snemma árs 2019 voru sjö menn sakfelldir fyrir þjófnað úr gagnaverum. Hlaut Sindri Þór Stefánsson þyngsta dóminn, eða fjögurra og hálfs árs fangelsi. Sindri Þór varð landsfrægur er hann strauk úr fangelsinu að Sogni þegar hann var þar í varðhaldi vegna málsins. (Sjá Fréttablaðið).

Auk fíkniefnanna er þess krafist að ýmiskonar búnaður í fórum þeirra félaga verði gerður upptækur. Er sá listi gífurlega langur og fjölskrúðugur. Þar á meðal eru Moldex-öngunargrímur, sprautur, mælikönnur, síur, tíu lítra balar, vinnuúlpur, stíflueyðir, lofttæmingarvél, rykgrímur og ótal margt fleira.

Málið verður tekið fyrir í Héraðsdómi Reykjavíkur en ákæran var gefin út þann 4. ágúst.