Veitur ohf. kynntu í dag nýja Framkvæmdasjá Veitna þar sem hægt verður að skoða framkvæmdir á vegum fyrirtækisins á vefnum. Þar má sjá hvað er verið að gera, hvenær verkið hefst og hvenær því á að ljúka, umfang þess og hverjir ábyrgðaraðilar eru vilji íbúar koma athugasemdum á framfæri við framkvæmdaraðila.
Í tilkynningu Veitna kemur fram að framkvæmdir við veitukerfin hafi aldrei verið jafn umfangsmikil og nú í sumar. Áður höfðu Veitur gert ráð fyrir að setja 9 milljarða árlega í fjárfestingar, en vegna Covid-19 faraldursins og áhrif þess á efnahagslífið jók stjórn fyrirtækisins framkvæmdaféð um 6 milljarða. Verða því samtals 15 milljarðar settir í endurbætur, nýfjárfestingar og viðhald á lagnakerfi fyrirtækisins á þjónustusvæði þess sem nær til yfir 70% af íbúum landsins.
„Til að kynna framkvæmdasjánna verður farið í markaðsherferðina Finnur vinnur en Finnur er í mynd öryggiskeilu, eins og þær sem finna má allsstaðar þar sem Veitur grafa í jörð. Finnur er oftar en ekki fyrstur á staðinn þegar stinga þarf niður skóflu og sá síðasti sem yfirgefur vettvang,“ segir í tilkynningunni.
Inná Framkvæmdasjánni er hægt að slá inn póstnúmer, ár og stöðu framkvæmdar og fá þá lista yfir framkvæmdir sem ætlaðar eru eða eru í gangi auk ætlaðra áhrifa þeirra á nágrenni þeirra. Ennfremur eru þar upplýsingar um útboð á vegum Veitna sem og bilanir og stöðu viðgerða á þeim.
Sjá má frekari upplýsingar inná Framkvæmdasjá Veitna.