Skemmtileg fréttaskýring um baráttu Íslendinga við COVID-19 í tímaritinu The New Yorker hefur vakið töluverða athygli. Þar er meðal annars greint frá því að blaðamaðurinn hafi fengið undanþágu frá reglum um tveggja vikna sóttkví fyrir atbeina Kára Stefánssonar, forstjóra Íslenskrar erfðagreiningar.
Í greininni er meðal annars farið yfir hvernig smitrakningartreymi lögreglunnar varð til og hvernig það starfaði og þá niðurstöðu að Íslendingar séu sem stendur búnir að ráða niðurlögum veirunnar. Fjallað er um lamandi áhrif faraldursins á ferðaþjónustuna á Íslandi og rætt við eigendur túristabúða í miðbænum. Sagt er frá því að flest smit í Vestmannaeyjum hafi orðið á handboltaleik og í leiðinni er handboltaíþróttinni lýst fyrir bandarískum lesendum sem flestum er hún framandi.
Smæð samfélagsins birtist með skemmtilegum hætti þegar höfundur greinarinnar, Elizabeth Kolbert, fær óvænt viðtal við Katrínu Jakobsdóttur forsætisráðherra. Elizabeth var þá að velta vöngum yfir hvernig Íslendingar ætla að framkvæma skimunina á ferðamönnum á Keflavíkurflugvelli frá og með 15. júní og er að ræða þetta við Kára Stefánsson þegar hann segir:
„„Viltu tala við forsætisráðherrann?“ Ég sagði já auðvitað. Hann hringdi í fjölmiðlafulltrúann hennar sem svaraði, svo hringdi hann beint í Jakobsdóttur sem svaraði.“
Örstuttu síðar hitti blaðamaðurinn Katrínu á skrifstofu hennar í Stjórnarráðinu. Katrín sagði þá við hana að hún hefði samþykkt viðtalið meðal annars vegna þess að það væri auðveldara en að rífast við Kára Stefánsson.
Síðan segir Katrín henni í stuttu máli frá því hvers vegna Íslendingar hafi náð svona góðum árangri í baráttunni við COVID-19 og hvað sé framundan þegar byrjað verður að taka á móti ferðamönnum.
Greinin er öll afar lipurlega skrifuð og skemmtileg og við mælum eindregið með henni. Smella hér