Í dag féll dómur yfir karlmanni fæddum árið 1998 fyrir kynferðisbrot gegn 13 ára stúlku. Atvikið átti sér stað í febrúar árið 2018 er maðurinn var tvítugur að aldri. Var hann sakfelldur fyrir að hafa haft samræði við stúlkuna í bíl.
Krafist var refsingar yfir manninum og greiðslu alls sakarkostnaðar. Einnig var maðurinn krafinn um 3.500.000 milljónir króna í miskabækur til þolandans.
Í dómnum kemur fram að hinn ákærði játar sök og viðurkennir bótaskyldu í málinu. Dómurinn tók tillit til þess að maðurinn á ekki sakaferil að baki og hann viðurkenndi brot sitt skýlaust.
Var hann dæmdur í 8 mánaða skilorðsbundið fangelsi og til að greiða þolanda eina milljón króna í miskabætur.
Athygli vekur að nafn hins ákærða er birt á vefsíðu dómstólanna. Almennt eru nöfn sakborninga í kynferðisbrotamálum ekki birt í dómum og flestir ef ekki allir dómar sem snerta ólögráða einstaklinga birtar nafnhreinsaðir með öllu.
DV hafði samband við lögmann unga mannsins, Ómar R. Valdimarsson. Sagðist hann telja nafnbirtinguna mjög óheppilega og sagðist álíta að um mistök væri að ræða. Sagðist hann ætla að kanna málið og freista þess að fá nafn sakbornings fjarlægt úr dómnum.