Kona í annarlegu ástandi var handtekin við ísbúð í miðbænum síðdegis í gær. Konan var sofandi framan við ísbúðina með notaða sprautu sér við hlið. Konan var færð á lögreglustöð og vistuð sökum ástands síns í fangageymslu lögreglu. Við vistun fundust ætluð fíkniefni hjá konunni.
Þetta kemur fram í Dagbók Lögreglunnar á höfuðborgarsvæðinu. Þar segir einnig frá því að um fjögurleytið síðdegis í gær voru höfð afskipti af manni á veitingahúsi í miðbænum. Hafði maðurinn fengið veitingar og ekki greitt reikninginn. Var hann kærður fyrir fjársvik.
Um svipað leyti í gær var tilkynnt um umferðaróhapp við Barónsstíg. Ekið var á ljósastaur. Ökumaðurinn hljóp af vettvangi en var handtekinn skömmu síðar. Er hann grunaður um ölvun við akstur og var látinn laus að lokinni sýnatöku og skýrslugjöf.
Um fimmleytið í gær var tilkynnt um innbrot í leikskóla í Hafnarfirði. Var rúða brotin og farið inn. Ekki er vitað hvort einhverju var stolið
Í nótt voru mörg útköll vegna ölvunar og partýhávaða, segir enn fremur í dagbókinni.
