Lögreglustjórinn á höfuðborgarsvæðinu hefur ákært ungan mann að nafni Eggert Davíð Jóhannsson fyrir tvö meint brot. Annars vegar er hann sagður hafa ráðist með ofbeldi á unga konu í sumarhúsi hér á landi, þann 20. apríl 2019, ýtt við henni og slegið hana með krepptum hnefa í andlit með þeim afleiðingum að hún hlaut þverbrot í hægri kjálka.
Hins vegar er Eggert gefið að sök að hafa stolið gullkeðju að verðmæti 390.000 krónur úr skartgripaverslun Jóns og Óskars í Kringlunni í Reykjavík. Það atvik á að hafa átt sér stað 7. apríl 2019.
Gerð er krafa um að Eggert verði dæmdur til refsingar og til greiðslu alls sakarkostnaðar.
Fyrir hönd konunnar sem Eggert er sakaður um að hafa kjálkabrotið er gerð skaða- og miskabótakrafa upp á tvær milljónir króna.
Fyrirtaka verður í málinu við Héraðsdóm Reykjavíkur þann 24. febrúar.
Að sjálfsögðu er á þessu stigi máls ekki hægt að staðhæfa að Eggert hafi framið þessi afbrot, réttarhöldunum er ætlað að leiða það fram. En í ljósi ákærunnar eru kynningarorð Eggerts á Facebook-síðu hans fremur óheppileg. Þar segir einfaldlega í kynningu á manninum:
„Ég er maðurinn sem feður ykkar vöruðu ykkur við“