Á laugardaginn, þann 14. nóvember, er alþjóðlegur dagur sykursýki. Af þessu tilefni mun streymisveitan Viaplay frumsýna heimildamyndina „Living Without Dying“, sem hefur fengið íslenska titilinn „Að lifa af – sykursýki í skugga covid“. Í myndinni ræðir sænski sjónvarpsmaðurinn Peter Jhide við sykursjúkt fólk á Norðurlöndunum. Meðal annars ræðir hann við Konráð Konráðsson, fertugan Íslending sem býr í Stokkhólmi, en hann þjáist af sykursýki 1.

Í myndinni segir Konráð frá því hvernig það er að lifa með sykursýki 1 á tímum COVID-19 en kastljósinu er beint að því. Myndin er gerð í samstarfi við Beat Diabetes-samtökin sem NENT Group, eigandi Viaplay, stofnaði fyrr á árinu.

Hér á landi hefur sykursjúkum fjölgað á síðustu árum eins og víðar í heiminum segir í kynningartexta með myndinni. Sykursjúkir eru sérstaklega viðkvæmir fyrir COVID-19 því þeir eru í meiri hættu á að fá alvarlega sjúkdóma ef þeir smitast.

,,Við höfum öll tekist á við stórar áskoranir undanfarið ár, en fyrir sykursjúka hefur þetta verið verra en fyrir marga aðra. Fyrir þennan sjúklingahóp hefur þetta snúist um, eins og svo oft áður – að lifa án þess að deyja,“ segir Peter Jhide.