Tvö mál féllu í dag í Héraðsdómi Reykjavíkur sem snéru að áralangri deilu Samherja, Þorsteins Más Baldvinssonar, forstjóra Samherja og Seðlabankans. Í öðru þeirra var um að ræða rúmlega 300 milljóna bótakröfu Samherja gegn Seðlabankanum vegna húsleitar Seðlabankans í húsakynnum Samherja á Akureyri og í Reykjavík þann 27. mars 2012. Í hinu málinu krafðist Þorsteinn Már miskabóta vegna húsleitarinnar og kæru gegn sér sem Seðlabankinn lagði fram.
Var þar Þorsteinn Már persónulega kærður til sérstaks saksóknara, forvera Héraðssaksóknara fyrir brot gegn gjaldeyrislögum á tímum gjaldeyrishafta. Rannsókn Seðlabankans gegn Þorsteini var látin niður falla um tveim árum síðar án frekari aðgerða ákæruvaldsins. Stjórnendur Samherja hafa alla tíð haldið sakleysi sínu fram og gagnrýnt aðferðir og málsmeðferð Seðlabankans við húsleitina sjálfa og rannsóknina sem fylgdi í kjölfarið.
Seðlabankinn var sýknaður af kröfu Samherja, en dæmdur til þess að greiða Þorsteini Má tvær og háfa milljón króna í skaðabætur auk vaxta. Þorsteinn gerði fimm milljóna skaðabótakröfu og miskabótakröfu að upphæð einnar og hálfrar milljónar.