Lögreglan á höfuðborgarsvæðinu fékk tilkynningu í nótt um mann sem fór yfir girðingu Reykjavíkurflugvallar. Tilkynningin barst klukkan rétt rúmlega hálf þrjú og var maðurinn á göngu eftir flugbraut á vellinum.
Hann var handtekinn og vistaður fyrir rannsókn máls í fangageymslu lögreglu, en hann er grunaður um að raska öryggi loftfara og húsbrot. Sami maður var einnig handtekinn rúmum 13 tímum áður fyrir sama brot. Þá var einnig búið að hafa afskipti af honum þar sem hann gat ekki greitt gjald fyrir akstur leigubifreiðar.
Lögregla fékk svo tilkynningu klukkan 22:30 í gærkvöldi um að flugeldi hafi verið kastað inn um glugga á baðherbergi íbúðar í Hafnarfirði. Eldur kom upp í fatnaði og skemmdir urðu á innréttingu baðherbergisins. Íbúar urðu varir við sprenginguna og voru búnir að slökkva eldinn þegar lögregla kom á vettvang.