Lík karls og konu fundust á Sólheimasandi í dag. Lík konunnar fannst laust undir hádegi en lík mannsins fannst um tvöleytið. Talið er að líkin séu af pari sem var að ferðast saman. Oddur Árnason yfirlögregluþjónn segir í samtali við RÚV að bæði karlinn og konan hafi verið rétt rúmlega tvítug.
Þá segir Oddur einnig að um sé að ræða ferðamenn frá Kína. „Kínverska sendiráðið hefur verið upplýst um persónuupplýsingar og er að vinna úr þeim upplýsingum núna fyrir okkur. Þannig er bara staðan,“ segir Oddur í samtali við Vísi um málið. Ekki er vitað hver orsök andlátsins eru en ekkert bendir til þess að um saknæmt athæfi sé að ræða. Talið er líklegt að parið hafi orðið úti.
Í samtalinu við Vísi sagði Oddur einnig að vegfarandi hafi komið að líki og fór lögreglan rakleiðis á vettvang í kjölfarið. „Þar kemur í ljós að svona 150 metra frá gönguleiðinni er lík af konu. Við köllum þá strax til frekari leit, okkur fannst sérstakt að það væri ein kona þarna ein á ferð og enginn sem spyrði um hana. Um tvöleytið fannst lík af karlmanni þarna skammt frá og síðan er rannsóknarvinna í gangi um hvað hafi gerst þarna.“
Aðspurður segir Oddur að þetta sé óvenjulegt mál. „Það er sérstakt að finna tvær látnar manneskjur á víðavangi. Það gerist ekki oft.“