Varðskipið Þór var statt á Ísafirði í gær og hélt fljótlega af stað til Flateyrar með 35 björgunarsveitarmenn, þrjá lögreglumenn og heilbrigðisstarfsfólk.  Skipið er komið þangað en nær ekki að leggja að bryggju því hún skemmdist í snjóflóðinu.

Þetta hefur RÚV eftir Rögnvaldi Ólafssyni hjá Almannavörnum. Björgunarmenn, lögreglumenn og heilbrigðisstarfsfólk verður ferjað í land. Þór mun síðan bíða úti fyrir Flateyri og verði til taks ef flytja þarf fleira fólk til eða frá Flateyri.

Haft er eftir Rögnvaldi að olíutankar hafi farið í sjóinn og byrjað sé að huga að því verkefni vegna mengunarhættunnar sem stafi frá þeim.

Hann sagði að flóðin, sem féllu á Flateyri, hafi verið mjög öflug, svipuð og flóðin sem féllu þar 1995. Hann sagði líklegt að svæðið fyrir ofan Flateyri sé búið að tæma sig að mestu en annarsstaðar í Önundarfirði sé enn snjóflóðahætta.

Vonskuveður er á Vestfjörðum og nær allir vegir lokaðir, þar á meðal til Flateyrar og Suðureyrar.