Karlmaður var á mánudag dæmdur í þriggja mánaða fangelsi fyrir húsbrot og eignaspjöll í Borgarbyggð.
Annars vegar var honum gert að hafa í febrúar brotið upp dyr og ruðst heimildarlaust inn á heimili brotaþola í Borgarbyggð og valdið við það skemmdum á dyraumbúnaði.
Eins var honum gert að hafa sparkað í framhurð bifreiðar og við það rispað lakk. Ákæruvaldið breytti reyndar orðalagi í ákæru og í stað þess að halda því fram að ákærði hafi sparkað í bifreiðina var orðalagi breytt í „sett annan fót sinn í hægri framhurð bifreiðarinnar.“
Ákærði var á skilorði þegar brotin voru framin. Játaði hann greiðlega og var það talið honum til málsbóta. Í dómsorði segir:
„Við ákvörðun refsingar ákærða er þess að gæta að það horfir honum til málsbóta að hann hefur greiðlega gengist við brotunum. Að öllu því virtu sem hér hefur verið rekið þykir refsing ákærða hæfilega ákveðin fangelsi í þrjá mánuði“
Eins gekkst hann við því að greiða brotaþola sínum skaðabætur vegna þeirra skemmta sem hann hafði unnið. Alls 28.044 krónur. Einnig var honum gert að greiða 30 þúsund krónur í málskostnað og svo þóknun verjanda síns – 8611.180 krónur auk rúmlega 54 þúsund króna í ferðakostnað.
