Samkvæmt dómskjölum í máli Stefáns Pillip Gíslasonar, sem grunaður er um morð í Pensacola í Flórída, lýsir hann sig saklausan af því að hafa orðið Dillon Shanks að bana aðfaranótt síðastliðins mánudags.
Stefán er fæddur á Íslandi árið 1991 en flutti aðeins hálfs mánaðar gamall til Bandaríkjanna. Hann hefur búið alla ævi í Pensacola í Florída en þar búa faðir hans og móðir einnig en þau eru 55 og 50 ára.
Margir ættingjar Stefáns búa á Íslandi en einnig býr hluti þeirra í London.
Dillon Shanks og Stefán munu hafa verið kunningjar en sá fyrrnefndi er 32 ára gamall.
Fyrirtaka í máli Stefáns verður þann 14. maí. Ráða má af gögnum að hann muni sitja í gæsluvarðhaldi þangað til og ekki verði greidd fyrir hann lausnartrygging.
Stefán á nokkurn sakaferil að baki. Hann var handtekinn vegna líkamsárásar í nóvember árið 2018. Þá hefur hann verið ákærður fyrir ölvunarakstur, vopnaburð og fyrir að flýja af vettvangi umferðaróhapps. Í byrjun október í fyrra var Stefán handtekinn vegna skilorðsrofs.
Eftir lát Dillon Shanks á aðfaranótt mánudags hringdi Stefán fyrst í lögreglu og greindi henni frá atvikinu. Síðan hringdi hann í föður sinn og sagði honum frá því sem hafði gerst.
Banamein Dillon Shanks var byssuskot í hálsinn, að því er kemur fram í frétt ABC News.
Samkvæmt frétt Pensacola News Journal var Dillon Shanks í nokkurra daga heimsókn í Pensacola. Lögreglu var ekki kunnugt um heimilisfang hans er sú frétt var skrifuð. Samkvæmt sömu frétt sagði Stefán er hann hringdi í lögregluna að Dillon Shanks hefði fyrirfarið sér. Tvö vitni veittu lögreglu hins vegar upplýsingar sem leiddu til þess að hún mat stöðuna svo að dauði Dillon Shanks hefði ekki verið sjálfsvíg. Stefán var síðan handtekinn síðdegis á mánudag.
