Mikil vonbrigði með aðgerðapakka II frá ríkisstjórninni vegna kórónuveirukreppunnar má greina í umræðum ferðaþjónustuaðila á samfélagsmiðlum í kvöld. Aðgerðirnar þykja afar smávægilegar, að minnsta kosti hvað ferðaþjónustuna varðar.

Meðal þeirra sem tjá sig er Þórir Garðarsson, stjórnarformaður Gray Line Iceland. Hann bendir á að ferðaþjónustan hafi orðið fyrir algjöru tekjuhruni vegna veirunnar. Hann segir að frysta þurfi lánagreiðslur til að ferðaþjónustufyrirtækin verði ennþá lifandi þegar ferðamenn komi hingað til landsins aftur. Þórir er ósáttur við báða aðgerðapakkana sem ríkisstjórnin hefur kynnt til þessa:

„Þessi aðgerðapakki veldur mér vonbrigðum. Mesta höggið vegna Covid-19 er á ferðaþjónustuna. Þar er algjört tekjuhrun. Ef ferðaþjónustan á að vera til staðar þegar ferðamenn koma loksins aftur, þá þarf að halda í henni lífi og frysta lánagreiðslur. Brúarlánin duga ekki, því að bankarnir vilja enga áhættu taka af því að lána tekjulausum fyrirtækjum. Þessir tveir aðgerðapakkar ríkisstjórnarinnar gagnast stærsta útflutningsatvinnuvegi þjóðarinnar lítið sem ekkert. Þeir taka ekki á því stóra viðfangsefni að halda ferðaþjónustunni á lífi meðan farsóttin gengur yfir. Nýjasti pakkinn lítur meira út eins og nammibarinn í Hagkaup, sitt lítið af hverju sem ráðuneytin og ríkisstofnanirnar geta úthlutað.“