Heilbrigðisráðuneytið hefur gefið út auglýsingu um breyttar reglur um takmarkanir á samkomum frá og með 4. maí.
Fjöldamörk samkomubanns hækka úr 20 í 50 manns, hægt verður að opna framhaldsskóla og háskóla og ýmsir þjónustuveitendur geta á ný tekið á móti viðskiptavinum, þar á meðal hárgreiðslustofur og nuddstofur.
Enn fremur falla alveg niður takmarkanir á fjölda nemenda í leik- og grunnskólum og einnig fjöldatakmarkanir við íþróttaiðkun og æskulýðsstarf barna á leik- og grunnskólaaldri.
Í auglýsingunni felst að reglur um fjöldatakmörk og um tveggja metra nálægðarmörk munu frá gildistöku hennar ekki eiga við um nemendur í starfsemi leik- og grunnskóla. Þannig verður því unnt að halda óskertri kennslu og vistun barna. Sama á við varðandi börnin í starfsemi dagforeldra, frístundaheimila, félagsmiðstöðva og annarri lögbundinni þjónustu á leik- og grunnskólastigi.
Sundlaugar og líkamsræktarstöðvar verða áfram lokaðar almenningi en skólasund verður leyfilegt. Sóttvarnalæknir leggur til við heilbrigðisráðherra að þegar líður að lokum maí verði skoðaðir möguleikar á að aflétta enn frekar takmörkunum á samkomum. Að því gefnu að ekkert standi slíkum breytingum fyrir þrifum verði stefnt að því að færa fjöldatakmarkanir úr 50 í 100 manns, opna sundlaugar og líkamsræktarstöðvar o.fl.
Auglýsing um takmörkun á samkomum vegna farsóttar sem tekur gildi 4. maí
