Karlmaður um þrítugt var um helgina úrskurðaður í fjögurra vikna síbrotagæslu, en maðurinn hefur ítrekað komið við sögu lögreglu undanfarnar vikur, aðallega fyrir þjófnaðarbrot.
Þetta kemur fram í dagbók lögreglunnar á höfuðborgarsvæðinu. Þar segir einnig frá húsleit og handtökum í Árbænum í dag:
„Þrír karlar á fertugsaldri voru handteknir í kjölfar húsleitar Lögreglunnar á höfuðborgarsvæðinu í iðnaðarhúsnæði í Árbæ í gær. Lagt var hald á talsvert af munum, sem grunur leikur á að séu þýfi. Á vettvangi fundust enn fremur ætluð fíkniefni, sem voru sömuleiðis tekin í vörslu lögreglu. Ekki er hægt að veita frekari upplýsingar um málið að svo stöddu.“
