43 starfsmönnum Íslandspósts var sagt upp störfum í dag og hefur Vinnumálastofnun og stéttarfélögum verið gert viðvart. Þetta kemur fram í tilkynningu frá fyrirtækinu sem Viðskiptablaðið vitnar til.
Mikið hefur verið rætt um slæma fjárhagsstöðu Íslandspósts að undanförnu og eru uppsagnirnar liður í hagræðingaraðgerðum sem nauðsynlegt þótti að ráðast í.
Samkvæmt upplýsingum DV fengu starfsmenn tölvupóst í morgun þar sem greint var frá aðgerðunum.
„Uppsagnirnar í dag eru sársaukafullar og taka á alla, en eru því miður óumflýjanlegar til að hægt sé að ná settum markmiðum í rekstri fyrirtækisins. Við þökkum starfsfólkinu fyrir þeirra störf og munum leggja okkur fram við að aðstoða það við næstu skref,“ er haft eftir Birgi Jónssyni, forstjóra Íslandspósts, í tilkynningunni.
Þá verður ráðist í skipulagsbreytingar samhliða uppsögnunum. Deildir verða sameinaðar eða lagðar niður. Áætlanir gera ráð fyrir að 500 milljónir króna sparist á ársgrundvelli með aðgerðunum.