Gunnar Rúnar Sigurþórsson, sem varð Hannesi Þór Helgasyni að bana með hrottalegum hætti árið 2010, er skráður á stefnumótaforritið Tinder samkvæmt frétt Fréttablaðsins. Allt bendir til að Gunnar Rúnar gangi laus þó að það hafi ekki fengist staðfest. Hann hefur ekki lokið afplánun en gæti verið á úrræði sem felur í sér að hann gangi laus undir eftirliti, til dæmis með ökklabandi.
DV bárust til eyrna sögusagnir í vor um að sæist til Gunnars Rúnars á ferli í Hafnarfirði. Þær sögur fengust aldrei staðfestar. DV hafði þá samband við Pál Winkel, forstjóra Fangelsismálastofnunar, sem tjáði DV að fangar með afbrot á borð við þetta á bakinu þyrftu að afplána tvo þriðju af dómi í það minnsta. Hins vegar væru alls konar úrræði í boði til að afplána utan fangelsis að hluta fyrir fanga sem sýndu af sér fyrirmyndarhegðun. Páll sagðist þá hafa góðan skilning á því að fólki væri illa við að sjá dæmda morðingja á ferli sem ekki væru búnir að afplána dóm en þarna væru að vegast á ólíkir hagsmunir, því úrræði á borð við t.d. ökklaband eða dagleyfi úr fangelsi gætu verið hluti af betrun og aðlögun manna út í samfélagið.
Í frétt Fréttablaðsins er rætt við Pál og hann segir:
„Það er ekki öruggt að menn séu búnir með afplánun þó þeir séu ekki lengur í fangelsi innan veggja fangelsanna. Þetta er svona tröppugangur. Þú byrjar í fangelsi, svo á áfangaheimili og endar svo heima hjá þér með ökklaband, undir rafrænu eftirliti sem kallað er.“
Fram kemur í fréttinni að stefnumótaforrit á borð við Tinder eða netnotkun yfirleitt sé ekki leyfð í lokuðu fangelsi. Því getur Gunnar Rúnar ekki verið virkur á Tinder nema hann sé utan fangelsis.
Ástarjátning sem Gunnar Rúnar birti á Youtube árið 2009 vakti mikla athygli og jafnvel hrifningu. Þar játaði hann ást sína til stúlku að nafni Hildur. Sú stúlka reyndist vera unnusta Hannesar Þórs Helgasonar en þau voru vinir, Hildur og Gunnar Rúnar. Árið eftir að Gunnar Rúnar birti myndbandið myrti hann Hannes Þór. Myndbandið með ástarjátningunni er enn á Youtube og má sjá það hér að neðan.
