Tónlistarmaðurinn Atli Bollason skrifaði grein á RÚV í gær þar sem hann minnir íslensku Eurovision keppendurnar í Hatara á að þeir hafi enn tækifæri til að nýta dagskrárvald sitt í Tel Aviv til að vekja athygli á stöðu Palestínu. Búningahönnuður Hatara, Karen Briem, hefur nú gefið til kynna á Instagram, að mögulega muni Hatari gera nákvæmlega það.

„Gjörningurinn ykkar er mjög vel heppnaður og hefur vakið verðskuldaða athygli. Ekki síst það sem þið hafið sagt og gert utan sviðs. Ramminn í keppninni sjálfri er þröngur og gerir allt svolítið að sama sullinu. Ég geri ráð fyrir að útsendingarstjórarnir haldi fast um taumana, sérstaklega þegar þið hin grímuklæddu og vígalegu eigið í hlut, og leyfi engin frávik frá æfingum. Þeir verða m.ö.o. fljótir að klippa í æfingu eða afsakið hlé ef þið farið að veifa palestínskum fánum eða öskra baráttuorð í hljóðnemann,“ segir í grein Atla.

Hann hvetur Hatara til að segja sig frá keppninni því sem land sem hafi þegar fengið sæti á aðalkvöldinu þá muni slík háttsemi vekja enn meiri athygli heldur en sniðganga frá upphafi

„Ef þið segið ykkur frá keppninni, nú þegar þið eruð komin áfram, þá lofa ég að eftir því verður tekið. Það væri eiginlega alveg magnað og myndi vekja verulega athygli. Athygli sem myndi beinast að þeim málstað sem þið hafið sjálf sagt að ferð ykkar til Tel Aviv hafi átt að vekja athygli á: Baráttu palestínsku þjóðarinnar gegn ofbeldi og yfirgangi Ísraela. […] Hver veit, ef þið spilið rétt úr, tekst ykkur kannski að sannfæra fleiri keppendur um að skrópa á laugardaginn.