Svo gæti farið að hitamet á sumardaginn fyrsta falli í Reykjavík í dag, en veðurspáin fyrir daginn er býsna góð – miðað við árstíma að minnsta kosti.
Í hugleiðingum veðurfræðings á vef Veðurstofu Íslands kemur fram að gamla hitametið í Reykjavík sé 13,5 gráður og gæti vel farið svo að það verði slegið. Klukkan 9 í morgun var 10,9 stiga hiti í Reykjavík og gæti hitinn farið í 14 gráður um og eftir hádegi, gangi spár eftir.
„Léttir til um mest allt land í dag, síst þar sem vindur stendur að landi eins á Austfjörðum, en þar mun hinn forni fjandi þeirra austfirðinga, þokan láta á sér kræla,“ segir í hugleiðingum veðurfræðings.
„Þar sem sólar nýtur og hæfilegur vindur fylgir með verður hið besta sumarveður og það svo að hitamet fyrir sumardaginn fyrsta í Reykjavík er í hættu en gamla metið er 13.5 stig. Hæsti staðfesti hiti á landinu þennan ágæta dag er 19.8 á Akureyri og óstaðfestmet 20.5 stig á Fagurhólsmýri. Þau sitja líklega áfram en ef allt fellur með gæti hitinn á svæðinu kringum Skaftafell hoggið nærri því, en vindur fyrir norðan verður líklega ekki nægur til að hitinn komist í hæstu hæðir,“ segir enn fremur.
Á laugardag:
Austlæg átt, 8-15 m/s, hvassast syðst. Rigning með köflum víða á landinu, en þurrt að kalla NV-til. Hiti 6 til 14 stig, hlýjast á V-landi.
Á sunnudag:
Suðaustlæg átt, 3-10 m/s og rigning með köflum, en þurrt að mestu fyrir norðan, 10-15 og samfelld rigning SV-lands um kvöldið. Hiti 6 til 13 stig, hlýjast á NA-landi.
Á mánudag og þriðjudag:
Austlægar áttir og dálítil væta öðru hvoru, einkum S- og A-lands, en áfram milt veður.
Á miðvikudag:
Hægir vindar, bjart með köflum og milt veður að deginum, en útlit fyrir norðanátt um kvöldið með skúrum eða slydduéljum fyrir norðan og kólnandi veður.