Svo virðist vera sem Íslendingar séu í auknum mæli farnir að sækja í fasteignir í Tampa og nágrenni borgarinnar í Flórída. Þó að eftirspurn eftir húsnæði frá útlendingum hafi minnkað um 15 prósent á síðasta ári er ekki það sama hægt að segja um Tampa – og eiga Íslendingar sinn þátt í því.

Fjallað er um málið á vef Tampa Bay Times en þar er rætt við Anne Pallister, fasteignasala hjá Re/Max í Tampa, sem unnið hefur með mörgum Íslendingum í gegnum tíðina.

„Ég er sjálf með tólf íslenska viðskiptavini á mínum snærum. Þetta eru einstaklingar eru annað hvort hættir að vinna eða við það að hætta að vinna,“ segir Anne sem ber Íslendingunum góða söguna. „Þeir eru mjög hjálpsamir og meðvitaðir um samfélagið sitt,“ segir hún.

Íslendingar hafa í gegnum árin sótt í fasteignir í Flórída en þá einkum í og við Orlando. Eftir að Icelandair hóf beint flug til Tampa árið 2016 virðist eftirspurnin hafa aukist eftir fasteignum á svæðinu.