Tilkynnt var um líkamsárás á heimili í miðborg Reykjavíkur rétt eftir klukkan eitt í nótt. Að sögn lögreglu var par í annarlegu ástandi handtekið og vistað í fangageymslu lögreglu vegna rannsóknar málsins. Árásarþoli hlaut sem betur fer minniháttar áverka.
Nóttin var annars með rólegasta móti hjá lögreglu. Rétt fyrir klukkan 22 hafði lögregla afskipti af ökumanni í Kópavogi. Hann reyndist vera á ótryggðri bifreið og voru skráningarnúmerin klippt af. Ökumaðurinn kvaðst ekki hafa vitað að bifreiðin væri ótryggð.
