Páll Magnússon, þingmaður Sjálfstæðisflokksins og fyrrverandi útvarpsstjóri, segist ekki treysta stjórn RÚV til að ráða nýjan útvarpsstjóra. Þetta sagði Páll á Alþingi í dag.
Eins og greint hefur verið frá hyggst stjórn RÚV ekki birta nöfn umsækjenda um stöðu úvarpsstjóra opinberlega. Umsóknarfrestur átti að renna út í gær en var framlengdur til 9. desember næstkomandi.
„Þessi síendurtekni vandræðagangur og vanhæfni af hálfu stjórnar Ríkisútvarpsins skapar vantraust. Af þeim ástæðum þá tel ég íhugunarefni fyrir stjórn Ríkisútvarpsins hvort hún ætti ekki, í ljósi stöðunnar, að víkja. Ekki treysti ég henni til að taka þá ákvörðun að ráða nýjan úitvarpsstjóra miðað við alla þessa himinhrópandi vanhæfni og vandræðagang. Og ef hún kýs ekki að gera þetta þá er það íhugunarefni fyrir menntamálaráðherra hvort hann ætti að boða til hluthafafundar og víkja stjórninni.“
