Helgi Seljan, fyrrverandi alþingismaður Alþýðubandalagsins, lést á Landspítalanum í Fossvogi síðastliðinn þriðjudag, 10. desember. Hann var 85 ára að aldri. Helgi var fæddur á Eskifirði 15. janúar 1934, sonur Friðriks Árnasonar og Elínborgar Kristínar Þorláksdóttur. Fósturforeldrar hans voru Jóhann Björnsson, bóndi í Seljateigi í Reyðarfirði, og Jóhanna Helga Benediktsdóttir.
Eftirlifandi kona Helga er Jóhanna Þóroddsdóttir. Börn þeirra eru Helga Björk, Þóroddur, Jóhann Sæberg, Magnús Hilmar og Anna Árdís. Alls eru afkomendurnir 34. Fjölmiðlamaðurinn og nafni, Helgi Seljan, er barnabarn hans.
Á vef Alþingis er starfsferli hans lýst svo: „Kennari á Búðum í Fáskrúðsfirði 1953–1955. Kennari við barna- og unglingaskólann á Búðareyri í Reyðarfirði 1956–1962, skólastjóri 1962–1971. Félagsmálafulltrúi hjá Öryrkjabandalagi Íslands síðan 1987. Formaður Sambands bindindisfélaga í skólum 1952–1953. Í hreppsnefnd Reyðarfjarðar 1962–1966 og 1970–1978. Skipaður 1971 í nefnd til að semja frumvarp um jöfnun námsaðstöðu og 1972 í staðarvalsnefnd ríkisstofnana. Kosinn 1973 í byggðanefnd. Í bankaráði Búnaðarbanka Íslands og stjórn Stofnlánadeildar landbúnaðarins 1973–1986. Kosinn í áfengismálanefnd 1975. Í stjórnarnefnd um málefni þroskaheftra og öryrkja 1979–1983, í endurhæfingarráði sama tíma. Í stjórnarnefnd um málefni fatlaðra 1979–1983 og síðan 1988. Í miðstjórn Alþýðubandalagsins um árabil. Formaður Landssambandsins gegn áfengisbölinu 1988–1994. Í áfengisvarnaráði 1987–1995. Í tryggingaráði 1989–1991.“
Útför Helga fer fram frá Grafarvogskirkju föstudaginn 20. desember klukkan 13.
