Varðskipið Þór sér nú Dalvíkurbæ fyrir um 70% af raforkuþörf. Upp úr miðnætti tókst tæknimönnum að tengja skipið við Dalvík og nýta það sem rafstöð fyrir bæinn. Þetta er í fyrsta sinn sem varðskipið Þór er nýtt sem hreyfanleg aflstöð.

Þetta kemur fram í tilkynningu frá Landhelgisgæslunni en rafmagnslaust hefur verið á Dalvík síðan óveðrið skall á á miðvikudagskvöld.

Þór getur flutt 2MW af rafmagni í land en það er nóg til þess að halda meðalstóru sveitarfélagi gangandi í neyðartilvikum.

Við hönnun skipsins var horft til þess að mögulegt yrði að senda rafmagn í land á afskekktum stöðum vegna rafmagnsleysis.  Til þessa hafa rafmagnsdreifingaraðilar og veitufyrirtæki ekki talið unnt að tengjast skipinu fyrr en nú, að því er segir í tilkynningu gæslunnar.