Einhver sem kallar sig JohannesTruth birti fyrr í dag á Youtube myndband sem ku sýna samtal Jóhannesar Stefánssonar við fyrrverandi eiginkonu hans.
Jóhannes er uppljóstrarinn sem kom upp um Samherja í Namibíu. Hann kom þúsundum gagna til Wikileaks eftir að hann hætti störfum.
Líklegt er að myndbandið sé birt til að koma höggi á Jóhannes. Samtalið virðist ekkert tengjast uppljóstrun Jóhannesar.
Hann hefur sjálfur sagt að namibíska lögreglan rannsaki tilraunir til að ráða hann af dögum. Hann sagðist hafa verið með allt upp í 13 lífverði í vinnu um tíma.
Ekki náðist í Jóhannes við vinnslu fréttarinnar en DV hefur ítrekað reynt að ná tali af honum. Samhengi myndbandsins er ekki ljóst en Jóhannes virðist í glasi og heitt í hamsi. Hann talar um að hann muni láta drepa einhvern mann.
Svo virðist sem sá maður hafi ætlað að berja Jóhannes. „Þá skal ég sjá til þess að hann verður drepinn á Litla-Hrauni,“ segir Jóhannes meðal annars í myndbandinu.