Stjórnarmenn Kredia Group eru þeir Ondrej Smakal og Vladimir Smakal. Þeir búa báðir í Tékklandi en eru þó með íslenska kennitölu.
Kredia Group er skráð til heimilis í London samkvæmt stofngögnum Brea ehf. Ríkisskattstjóri tók við tilkynningu um stofnun Brea ehf. í síðastliðnum október. Tveimur dögum áður en tilkynningin var send var stofnfundur Brea haldinn á Íslandi.
Á stofnfundinum voru þeir Ondrej og Vladimir en auk þeirra var lögmaðurinn Ingvar Smári Birgisson viðstaddur. Athygli vekur að Ingvar Smári er þekktur áhrifamaður innan Sjálfstæðisflokksins en hann er fyrrverandi formaður Sambands ungra Sjálfstæðismanna. Ingvar Smári tilkynnti um stofnun fyrirtækisins Brea. Vísir greindi frá því
Kredia Group á mörg af þekktustu smálánafyrirtækjum Íslands eins og 1909, Hraðpeninga, Smálán og Múla. Öll þessi félög gera fólki kleift að taka smálán á netinu en það hefur vakið athygli að vefsíður þessara fyrirtækja eru skráð í Danmörku. Þrátt fyrir það er öll þjónusta á íslensku auk þess sem innheimta hefur verið í umsjón íslensks fyrirtækis.
Smálánafyrirtæki hafa lengi verið gagnrýnd fyrir óvenju háa vexti. Um tveir þriðju af öllum þeim sem leita til Umboðsmanns skuldara leituðu þangað vegna smálánafyrirtækja eins og þeirra sem eru í eigu Kredia Group.