Íslendingarnir voru barðir og síðan var óþekktu efni úðað á andlit þeirra. Lögreglan elti þá grunuðu og handtók tvo táninga í tengslum við árásina.
The Argus greinir frá því að Íslendingarnir hafi verið á vappi í Brighton þegar hópur af svartklæddum mönnum veittist að þeim. Vísir fjallaði fyrst um málið hér á landi.
Íslendingarnir voru fluttir á Royal Sussex County spítalann vegna þeirra áverka sem þeir hlutu af árásinni. Þeir voru marðir og bólgnir í andlitinu eftir árásina.
Lögreglunni var tilkynnt um árásina um klukkan hálf fimm að morgni laugardags. Lögreglan fékk lýsingu á útliti þeirra grunuðu og kom stuttu síðar auga á menn sem pössuðu við lýsinguna.
Mennirnir hlupu á brott en lögreglan náði tveimur 17 ára piltum sem voru handteknir. Þeir eru grunaðir um árásina en auk þess höfðu þeir á sér skotvopn og úðabrúsa sem innihélt eitraðan vökva. Annar drengjanna er einnig grunaður um þjófnað og vörslu fíkniefna.
Sebastian Day, varðstjóri á svæðinu, tjáði sig um málið ásamt því sem hann óskaði eftir vitnum að árásinni. „Þetta var viðurstyggileg árás“ sagði varðstjórinn.
